مقابلة خاصة ضمن سلسلة لقاءات “موهبة مُلهمة” – من مبادرة آل حسين لدعم النفس وتطوير الذات مع الرسامة المبدعة: مريم محمود أحمد
---
سـ/ يشرّفنا نبدأ بالتعرّف عليك.. الاسم، السن، المحافظة، والموهبة؟
جـ/ إسمي مريم محمود أحمد
17 سنه
من محافظة الجيزة
عندي موهبة الرسم والقراءة في بعض الأحيان
سـ/ إمتى اكتشفت موهبتك؟ وإزاي بدأت أول خطواتك؟
جـ/ إكتشفت إني بحب الرسم وأنا في الصف الثالث الإبتدائي وكنت بعبر عن أي مشاعر عندي بالرسم وأول خطوة عملتها إني إستعنت بصديق ساعدني ووقف بجانبي إني أطور رسمي وأنميه جزاه الله كل الخير
سـ/ هل قابلت صعوبات أو ناس قللت منك؟ عملت إيه وقتها؟
جـ/ بصراحه كنت بحسب في البداية إني هلاقي الرسم حاجه سهله والدنيا جميله بس بعد كده اكتشفت أنه مش سهل زي ما كنت بظن وناس كتير حاولت معايا إني اسيبه وأشوف حاجه تانيه من منظورهم تكون مفيدة اكتر بس انا تمسكت بيه عشان ساعتها كان ده الطريق الوحيد إللي بعبر عنه أي مشاعر عندي خصوصاً إني شخص كتوم وخجول شويه
سـ/ هل بتطوّر موهبتك؟ إزاي بتشتغل عليها؟
جـ/بحاول أطورها علي قد ما أقدر كل فترة بشوف فيديوهات لتطوير الرسم وبحاول اشوف صور وأقلدها وبجرب أنواع مختلفة من الألوان عشان أشوف أي واحدة ارتاحت ليها وبجرب برضو انواع الرسم وأشوف أنهي طريقة منسباني زي الرسم بالرصاص أو بالتنقيط أو بالألوان المائية أو ألوان الجواش أو الأكليريك ... إلخ وبحاول أتعلم من الأخطاء واتجنبها بعد كده
سـ/ في لحظة فرقت معاك وخلتك تتمسك أكتر بموهبتك؟
جـ/ بصراحه كان المفروض إن اقرب الناس ليا إنهم يشجعوني علي الرسم بس حصل العكس خالص بقيت اسمع منهم كلام مكنش المفروض يتقال خالص زي إن الرسم ده تضييع للوقت أو أنه ملهوش مستقبل ومن الكلام ده كتير إللي خلاني اتمسك بالرسم اكتر إني كنت بهرب بكلامهم بالرسم وخلاني أتأكد كويس إن ديه مبقتش مجرد موهبه ديه بقت حياتي كلها
سـ/ شايف المجتمع بيقدّر الموهبة دي؟ ولو لأ، تتمنى إيه؟
جـ/ بصراحه معظم المجتمع مش بيشجع الفن عمتاً زي الرسم كده وتلاقي المجتمع كله بينبهر بالدكتور أو المهندس ومحدش بيهتم بالفنانين عمتاً فا اتمني من كل قلبي إني أشهد علي اليوم إللي يكون فيه الرسم ده حاجه أساسية وجميله والناس تهتم بيه زيه زي الدكتور و المهندس
سـ/ لو حد عنده موهبة ولسه خايف يطلعها.. تقول له إيه؟
جـ/أحب أقول لأي شخص بيحب الرسم سواء كان رسمك حلو أو لا لازم تكمل فيه ربنا إداك موهبة مش اي شخص عنده موهبة الرسم إنت مميز جدا ومتخليش أي شخص يحبطك بكلامه
سـ/ من وجهة نظرك، إزاي الموهبة بتخدم الصحة النفسية؟
جـ/ هو أصلا إنت لما تمسك ورقة وقلم ورسمت أو شخبطت أو حتي كتبت إنت كده بتساعد نفسك من غير وعي إنك تطلع كل إللي جواك فا إنت كده مش معرض إن يبقي عندك كبت فا ده بيساعد جداً في الحفاظ على نفسية سليمة
سـ/ كلمة منك لمبادرة "آل حسين" وإزاي شايف دورها؟
جـ/ انا احب أقول للمبادرة الجميلة ديه إنها حاجه تحفه بجد ومبسوطة جداً إن لسه فيه ناس لطيفة خلت دورها الإهتمام بالناس وبتساعدهم في تنمية المهارات وبتشجعهم وحقيقي بتمني لو كل الناس كده وجزاكم الله كل الخير
سـ/ وفي ختام كلامك، تحب تقول إيه لأي حد لسه بيبدأ؟
جـ/ أحب أقول إن مهما كان إللي إنت عايزه ونفسك تحققه لازم تسعي ليه عشان مفيش حاجة من غير ثمن وبأكد ليك إنك في الأخر هتحس بفرحه الإنتصار بإذن الله اسأل الله التوفيق للجميع 💗
الحوار تم تحت إشراف رئيسة التحرير/ حبيبة تامر حسين
تعليقات
إرسال تعليق